Աչքերը քո` հոգուս կանթեղ,
Իմ մշուշված ճամփի փարոս,
Գիշերներով կանչում ես դեռ,
Ուրեմն քեզ պիտի փնտրեմ մինչ առավոտ:

Աչքերը քո` կյանքիս մի էջ,
Ցավի մի բույլ, մի երգ անգիր,
Աչքերը քո` կրակ անշեջ
Ծածուկ հառաչ, խոստովանանք, սրտիս թրթիռ:

կրկներգ
Ծովից ելած անտուն քամին
Քո մազերին թող ես շաղեմ,
Փափուկ, ինչպես ամռան կեսին մի ձյան փաթիլ,
Քո շուրթերին ես արցունքվեմ:

Սիրտս թեկուզ փնտրի դադար,
Թող աչքերիդ լույսը վառվի,
Ամեն անգամ, երբ գիշերով ես ուշանամ,
Ամեն անգամ, երբ հոգուս մեջ ձմեռ լինի:

Աչքերը քո` հոգուս կանթեղ
Մի չգրված խենթ պատմություն,
Երազներից հյուսված թել-թել
Պապակ ու չոր իմ շուրթերի հիշողություն:

Աչքերը քո` անծայր մի դաշտ,
Տիեզերքի նոր հայտնություն,
Աչքերը քո քնքուշ հրաշք,
Հոգուս համար կառափնարան, թե թողություն:

կրկներգ
Ծովից ելած անտուն քամին
Քո մազերին թող ես շաղեմ,
Փափուկ, ինչպես ամռան կեսին մի ձյան փաթիլ
Քո աչքերին ես արցունքվեմ:

Աչքերը քո` հոգուս կանթեղ,
Աչքերը քո` մի խենթ երազ,
Աչքերը քո` անտուն քամի...
Երազներից թել-թել հյուսված:

01.2006. Երևան

Արմեն Մովսիսյան